FANYA HAYA PENZI KAMA PENZI LIMEVUNJIKA

ALINIFANYA nijihisi kuwa wa pekee sana. Nilikuwa na hisia ambazo sikuwa nimepata kuwa nazo hapo awali. Lakini ndipo akasema kwamba hakufikiri uhusiano huo ungefaulu. Nilidhani maisha yangu yalikuwa yamekwisha. Nililia mchana kutwa na usiku kucha. Sikula, wala sikulala, nilipoteza uzito wa pauni 30 [kilogramu 15] katika muda wa miezi michache, na hata nikashikwa na ugonjwa wa koo. Maisha hayakuwa na maana kwangu.”—Renee.

Ikiwa umepata kuumizwa na kuvunjika kwa uhusiano wa kimahaba, labda unafahamu ombolezo hilo. Wajua vema jinsi ilivyo wakati una hisia za mapenzi kwa mtu, kisha matumaini yako yakatizwe. Hisia ya kukataliwa ni yenye nguvu sana, na yenye kushusha sana. Unapojitahidi kushinda maumivu hayo, huenda ukajiuliza, ‘Mbona nisisahau tu uhusiano huo—nimsahau huyo na kuendelea na maisha yangu?’ Ni mara chache sana inapokuwa rahisi hivyo.

Kwa Nini ni Vigumu Sana?

Uchunguzi mmoja ulionyesha kwamba kile kifungo cha mapenzi ya mahaba chaweza kuwa chenye nguvu sana. Hata kimelinganishwa na kifungo cha mzazi na mtoto. Ingawa bila shaka itachukua muda mrefu kwa mapenzi ya mahaba kukua kufikia kiwango hicho, bado, hisia zaweza kuhisiwa ndani zaidi tokea mwanzoni. Huwezi kuzibadili hivi na vile kama kuzima swichi ya taa. Na ukiwa katika kile kipindi ambacho Biblia inakiita “uzuri wa ujana,” kuamka kwa tamaa za kingono kwaweza kuwa kwenye nguvu sana. (1 Wakorintho 7:36) Jambo hilo lafanya kupoteza rafiki mvulana au msichana kuwe jambo gumu sana kuvumilia.

Bado Wapendwa

Hivyo uchunguzi uo huo wasema kwamba “kumpoteza mwenzi wa kimahaba . . . kwaweza kutokeza hisia za kujiona kushindwa na kutofaa.” Jeanette akumbuka: “Unahisi umeshuka moyo sana, kana kwamba hakuna mtu anayekujali. Hujali tena. Unahisi umekataliwa.” Kama yeye, wengi huhisi wameshuka moyo, hujihisi wenye hatia, wasiofaa, wasioweza kukazia akili mambo. Wengine hata wamejiua.

Kwa hiyo, huo waweza kuwa wakati hatari kwako. Ingawa hivyo, kumbuka himizo la Yesu la ‘kupenda jirani yako kama nafsi yako.’ (Marko 12:31) Kiasi fulani cha kujipenda kinahitajiwa na kinafaa. Jambo la kwamba mtu mmoja alikataa kuitikia mapenzi yako ya kimahaba halimaanishi kwamba huwezi kupendeka, sivyo? Huwezi kudhania kwa kufaa kwamba hakuna mtu yeyote anayeweza kukuona kuwa wapendeza au kuvutia, sivyo? Je! wewe huna washiriki wa familia au marafiki wanaokupenda?

Jambo la maana zaidi, Mungu anahisije kukuelekea? Lea, mwanamke aliyeishi katika nyakati za Biblia, lazima awe alihisi sana uchungu wa kukataliwa. Alijua vema kwamba mume wake, Yakobo, alidanganywa ili amwoe na kwamba alimpenda Raheli zaidi. Si ajabu kwamba alijihisi “amechukiwa” [NW] na mwenye huzuni. Ingawa hivyo, Mungu aliuona wema kwa Lea. Alimbariki kwa watoto wengi, na mistari yote miwili ya vizazi vya kikuhani na kifalme—kilichotokeza Mesiya—vilipitia kwake wala si kwa Raheli.—Mwanzo 29:30-35.

Hakuna kukataliwa kunakoweza kubadili uhalisi wa baraka na upendo wa Mungu. Kumbuka kwamba Muumba wa ulimwengu wote mzima anakupenda hivi kwamba aliruhusu Mwana wake ateseke na kufa kwa ajili yako. (Yohana 3:16) Wewe si mtu ambaye hawezi kupendwa, na hakika unafaa.

Wakati Mvunjiko Unapokuwa Baraka ya Kweli

Huenda ukahisi kwamba mvunjiko huo ni mojapo mambo mabaya zaidi yaliyowahi kukupata, lakini waweza kuwa kinyume kabisa. Ingawa ni vigumu kuamini, yaelekea kwamba mwisho wa mahaba yenu ni baraka. Kwa njia gani? Uhusiano mwingi wa kimahaba wa matineja mara nyingi haufanikiwi. Vijana bado wanakua na kubadilika; wanapatwa kwa urahisi na tamaa za muda mfupi na mapenzi yasiyo ya kweli. Hata hivyo, maelfu ya matineja huoa na kuolewa, ndipo wao hugundua ikiwa kumechelewa mno kwamba walikosea. Mkurugenzi mmoja wa gazeti moja alisema hivi baada ya talaka yake: “Lilikuwa kosa kubwa kuolewa nikiwa mchanga mno. Kwa kweli sikuelewa kwamba tulikuwa na mapendezi na malezi tofauti sana.”

Ndoa za matineja zina kiwango cha juu sana cha kuvunjika. Kwa hiyo, ingawa waweza kuhisi vibaya sana sasa, uwe na uhakika wa jambo moja—ungehisi vibaya hata zaidi ikiwa ungefungwa katika ndoa isiyo na furaha. Jiulize kama kweli ulikuwa tayari kwa ndoa ya maisha yote, ikiwa na madaraka yayo yote, kutia ndani kulea watoto. Je! kweli yule uliyempenda alikuwa tayari na pia mkomavu? Kumbuka kwamba kuvunjika kwa uchumba si jambo chungu sana kama kuvunjika kwa ndoa.

Mvunjiko huo ulikuwa baraka hasa kama ulifanya kosa la kujihusisha na mtu ambaye hastahi kanuni za kimungu na viwango vya adili. (2 Wakorintho 6:14) Shana akumbuka hatari za kiadili za kuwa na rafiki mvulana wa kilimwengu: “Nyakati zote alisemaananipenda. Lakini angeniuliza nifanye ngono naye. Mimi ningekataa. Nilijua ni kosa kufanya hivyo. Baadaye aliacha kunipigia simu. Nikalia usiku kucha—lilikuwa jambo gumu sana kwangu kumpoteza!” Hata hivyo, kwa wazi mvunjiko huo ulimwokoa Shana asipatwe na msiba wa kiroho.

Kwa hiyo, waweza kuona mvunjiko huo kuwa jambo la kujifunza kutokana nalo. Ni kama Mithali 22:3 isemavyo, “mwenye busara huyaona mabaya na kujificha; bali wajinga huendelea mbele wakaumia.” Je! lililokupata litakufanya uwe mwenye busara zaidi, ili uepuke matatizo wakati ujao?

Kukabiliana na Hisia

Hata hivyo, hata ikiwa mvunjiko ulikuwa ndilo jambo bora zaidi kwako, bado unaleta uchungu. Unaweza kushughulikaje na hisia zinazobaki? Kwanza, haisaidii kujifanya kwamba huhisi chochote. Kama vile gazeti ʼTeen lilivyosema hivi karibuni juu ya jambo hilo, “hisia si vitu ambavyo unaweza kuvitoroka au kujifichia. Hatimaye vitakupata.”

Ni kawaida kwako kuhisi umeudhiwa, ukikasirika sana juu ya jambo hilo. Lakini usikandamize hisia zako, ukienda kulala kila usiku ukiwa na maumivu. Fuata shauri lenye hekima la Biblia: “Mwe na hasira, ila msitende dhambi; jua lisichwe na uchungu wenu bado haujawatoka.” (Waefeso 4:26) Ongea na rafiki unayemtumaini au msiri wako. “Pasipo mashauri makusudi hubatilika,” yasema Mithali 15:22. Wazazi wako au wazee Wakristo wanaweza kukusaidia sana katika hali hizo. Huenda ukapata kujua kwamba wao pia walipata maono machungu kama hayo walipokuwa vijana.

Msaada mwingine wa kukabiliana na hisia ni kujishughulisha. Unaweza kuwa na tabia ya kuwa mpweke, kujitenga, kuwa na mawazo mengi, na kukosa kupendezwa na maisha. Jeanette akumbuka: “Hujihisi kufanya chochote. Unalala sana tu.” Lakini kama vileMithali 18:1 inavyoonya, “ajitengaye mwenyewe hutafuta matakwa yake mwenyewe; hushindana na kila shauri jema.” Badala ya kufanya hivyo, jishughulishe. Rudi katika ushirika wa kikundi cha wale watakaokutia moyo ufuate njia inayofaa.

Njia bora kabisa ya kutumia nishati zako ni kujiingiza katika huduma ya Kikristo. Mtume Paulo aliandika: “Basi ndugu zangu wapendwa, mwimarike, msitikisike, mkazidi sana kutenda kazi ya Bwana sikuzote, kwa kuwa mwajua ya kwamba taabu yenu siyo bure katika Bwana.” (1 Wakorintho 15:58) Usihisi kwamba Maisha yako ni matupu au hayana maana. Kushiriki habari njema na wengine huleta furaha na uradhi.—Matendo 20:35.

Kumbuka pia kwamba kwa muda fulani utakuwa na siku zilizo njema na siku zilizo mbaya. Katika siku zilizo mbaya unaweza kuhisi kwamba hutashinda kamwe hisia hizo. Lakini ukweli ni kwamba, utahisi vizuri zaidi. Kidonda kinachopona—hata kiwe kipi—huchukua muda. Usikawishe muda huo kwa kusikiliza muziki wa kimahaba au wenye kuchochea hisia na kuwa na mawazo mengi juu ya mpenzi wako aliyepotea. Mtegemee Yehova upate nguvu. Anajua vizuri sana jambo linalokupata na jinsi unavyohisi. “BWANA [Yehova, NW] yu karibu nao waliovunjika moyo, na waliopondeka roho huwaokoa.”—Zaburi 34:18.

Nyakati Nyangavu Ziko Mbele

Ukiwa kijana, mojapo baraka zako kubwa zaidi ni wakati. Kuna wakati mwingi ajabu mbele yako wa kujifunza na kupata ujuzi. Kwa hiyo, tumia wakati huo wenye thamani kwa hekima; sitawisha sifa ambazo zitakuwezesha uwe mtu mzima aliye thabiti na salama. Kwa njia hiyo, utaweza kufanya maamuzi ya hekima juu ya uchumba na ndoa wakati ujao.

Hata uwe mgumu kadiri gani, wakati huo wenye uchungu utapita, na hata unaweza kukupa hekima zaidi. Renee, aliyetajwa mapema, asema hivi: “Ninaweza kushughulika na hisia zangu kwa njia bora zaidi sasa. Nimejifunza mengi sana. Nimejifunza kwamba mambo yatakuwa mazuri tu kwa kuyafanya kwa njia ya Yehova.”

Share this post